ꦱꦼꦫꦠ꧀ꦮꦸꦭꦁꦫꦺꦃ - ꦩꦱ꧀ꦏꦸꦩꦩ꧀ꦧꦁ | Serat Wulang Reh - Maskumambang
꧁ꦩꦱ꧀ꦏꦸꦩꦩ꧀ꦧꦁ꧂
꧇꧑꧇
1
ꦤꦢꦾꦤ꧀ꦱꦶꦭꦶꦃꦧꦥꦧꦶꦪꦸꦁꦏꦏꦶꦤꦶꦤꦶ
Nadyan silih bapa biyung kaki nini
ꦱꦢꦸꦭꦸꦂꦩꦾꦁꦱꦤꦏ꧀
Sadulur myang sanak
ꦏꦭꦩꦸꦤ꧀ꦩꦸꦫꦸꦏ꧀ꦠꦤ꧀ꦧꦼꦕꦶꦏ꧀
Kalamun muruk tan becik
ꦤꦺꦴꦫꦥꦤ꧀ꦠꦼꦱ꧀ꦪꦺꦤ꧀ꦢꦺꦤ꧀ꦤꦸꦠ
Nora pantes yen den nuta
꧇꧒꧇
2
ꦄꦥꦤ꧀ꦏꦪꦔꦺꦴꦤꦺꦴꦮꦮꦠꦼꦏꦤꦶꦏꦶ
Apan kaya ngono wawatekan iki
ꦱꦤꦢꦾꦮꦺꦴꦁꦠꦸꦮ
Sanadya wong tuwa
ꦪꦺꦤ꧀ꦢꦸꦮꦺꦮꦠꦼꦏ꧀ꦠꦤ꧀ꦧꦼꦕꦶꦏ꧀
Yen duwe watek tan becik
ꦩꦶꦮꦃꦠꦶꦤ꧀ꦢꦏ꧀ꦠꦤ꧀ꦥꦿꦪꦺꦴꦒ
Miwah tindak tan prayoga
꧇꧓꧇
3
ꦄꦗꦱꦶꦫꦤꦶꦫꦸꦠꦶꦤ꧀ꦢꦏ꧀ꦏꦁꦠꦤ꧀ꦧꦼꦕꦶꦏ꧀
Aja sira niru tindak kang tan becik
ꦤꦢꦾꦤ꧀ꦠꦮꦺꦴꦁꦭꦶꦪ
Nadyan ta wong liya
ꦭꦩꦸꦤ꧀ꦥꦩꦸꦫꦸꦏꦺꦧꦼꦕꦶꦏ꧀
Lamun pamuruke becik
ꦩꦶꦮꦃꦠꦶꦤ꧀ꦢꦏ꧀ꦏꦁꦥꦿꦪꦺꦴꦒ
Miwah tindak kang prayoga
꧇꧔꧇
4
ꦅꦏꦸꦥꦤ꧀ꦠꦼꦱ꧀ꦱꦶꦫꦠꦶꦫꦸꦮꦠꦏꦏꦶ
Iku pantes sira tirua ta kaki
ꦩꦶꦮꦃꦧꦥꦧꦶꦪꦁ
Miwah bapa biyang
ꦄꦩꦸꦫꦸꦏ꧀ꦮꦠꦼꦏꦤ꧀ꦧꦼꦕꦶꦏ꧀
Amuruk watekan becik
ꦅꦏꦸꦏꦏꦶꦌꦱ꧀ꦠꦺꦴꦏꦼꦤ
Iku kaki estokena
꧇꧕꧇
5
ꦮꦺꦴꦁꦠꦤ꧀ꦩꦤꦸꦠ꧀ꦥꦶꦠꦸꦠꦸꦂꦮꦺꦴꦁꦠꦸꦮꦈꦒꦶ
Wong tan manut pitutur wong tuwa ugi
ꦥꦤꦼꦩꦸꦢꦸꦫꦏ
Panemu duraka
ꦅꦁꦢꦸꦚꦠꦸꦩꦼꦏꦺꦁꦄꦏ꦳ꦶꦂ
Ing dunya tumekeng akhir
ꦠꦤ꧀ꦮꦸꦫꦸꦁꦏꦱꦸꦫꦁꦱꦸꦫꦁ
Tan wurung kasurang surang
꧇꧖꧇
6
ꦩꦫꦠꦤꦶꦅꦁꦄꦤꦏ꧀ꦥꦸꦠꦸꦅꦁꦮꦸꦫꦶ
Maratani ing anak putu ing wuri
ꦢꦺꦤ꧀ꦥꦝꦥꦿꦪꦶꦠ꧀ꦤ
Den padha prayitna
ꦄꦗꦤꦏꦁꦏꦸꦩꦮꦤꦶ
Aja na kang kumawani
ꦅꦁꦧꦥꦠꦤꦥꦶꦧꦶꦪꦁ
Ing bapa tanapi biyang
꧇꧗꧇
7
ꦄꦤꦈꦒꦌꦠꦔꦺꦠꦔꦺꦏꦏꦶ
Ana uga etang etange kaki
ꦭꦶꦭꦶꦩꦱꦶꦤꦼꦩ꧀ꦧꦃ
Lilima sinembah
ꦢꦸꦤꦸꦔꦺꦱꦮꦶꦗꦶꦮꦶꦗꦶ
Dununge sawiji wiji
ꦱꦼꦩ꧀ꦧꦃꦭꦶꦭꦶꦩꦥꦸꦤꦶꦏ
Sembah lilima punika
꧇꧘꧇
8
ꦅꦔ꧀ꦏꦁꦝꦶꦔꦶꦤ꧀ꦫꦩꦅꦧꦸꦏꦥꦶꦁꦏꦭꦶꦃ
Ingkang dhingin rama ibu kaping kalih
ꦩꦫꦁꦩꦫꦠꦸꦮ
Marang mara tuwa
ꦭꦤꦁꦮꦢꦺꦴꦤ꧀ꦏꦁꦏꦥꦶꦁꦠꦿꦶ
Lanang wadon kang kaping tri
ꦪꦩꦫꦁꦱꦢꦸꦭꦸꦂꦠꦸꦮ
Ya marang sadulur tuwa
꧇꧙꧇
9
ꦏꦥꦶꦁꦥꦠꦺꦪꦩꦫꦁꦒꦸꦫꦸꦱꦪꦼꦏ꧀ꦠꦶ
Kaping pate ya marang guru sayekti
ꦱꦼꦩ꧀ꦧꦃꦏꦥꦶꦁꦭꦶꦩ
Sembah kaping lima
ꦪꦩꦫꦁꦒꦸꦱ꧀ꦠꦶꦤꦶꦉꦏꦶ
Ya marang Gustinireki
ꦥꦫꦶꦚ꧀ꦕꦶꦤꦺꦏꦮꦿꦸꦲꦤ
Parincine kawruhana
꧇꧑꧐꧇
10
ꦥꦿꦩꦶꦭꦤꦺꦫꦩꦅꦧꦸꦢꦺꦤ꧀ꦧꦼꦏ꧀ꦠꦺꦤꦶ
Pramilane rama ibu den bekteni
ꦏꦶꦤꦂꦪꦗꦭꦫꦤ꧀
Kinarya jalaran
ꦄꦤꦤꦺꦧꦢꦤ꧀ꦥꦸꦤꦶꦏꦶ
Anane badan puniki
ꦮꦶꦤꦼꦫꦸꦃꦏꦺꦥꦝꦁꦲꦮ
Wineruhken padhang hawa
꧇꧑꧑꧇
11
ꦈꦫꦶꦥꦶꦫꦥꦶꦤ꧀ꦠꦼꦂꦱꦩꦸꦧꦫꦁꦏꦂꦢꦶ
Uripira pinter samubarang kardi
ꦱꦏꦶꦁꦅꦧꦸꦫꦩ
Saking ibu rama
ꦅꦁꦧꦠꦶꦤ꧀ꦱꦏꦶꦁꦲꦾꦁꦮꦶꦝꦶ
Ing batin saking Hyang Widhi
ꦩꦸꦭꦤꦺꦮꦗꦶꦧ꧀ꦱꦶꦤꦼꦩ꧀ꦧꦃ
Mulane wajib sinembah
꧇꧑꧒꧇
12
ꦥꦤ꧀ꦏꦶꦤꦂꦱꦏꦏꦼꦤꦶꦁꦲꦾꦁꦏꦁꦭꦶꦤꦸꦮꦶꦃ
Pan kinarsakaken ing Hyang kang linuwih
ꦏꦶꦤꦂꦪꦭꦤ꧀ꦠꦫꦤ꧀
Kinarya lantaran
ꦄꦤꦺꦁꦅꦁꦢꦺꦴꦚꦥꦸꦤꦶꦏꦶ
Aneng ing donya puniki
ꦮꦼꦫꦸꦃꦅꦁꦧꦺꦕꦶꦏ꧀ꦭꦤꦭ
Weruh ing becik lan ala
꧇꧑꧓꧇
13
ꦱꦏꦶꦁꦅꦧꦸꦫꦩꦩꦂꦒꦤꦺꦈꦢꦤꦶ
Saking ibu rama margane udani
ꦩꦶꦭꦩꦫꦠꦸꦮ
Mila mara tuwa
ꦭꦤꦁꦮꦢꦺꦴꦤ꧀ꦢꦺꦤ꧀ꦧꦼꦏ꧀ꦠꦺꦤꦶ
Lanang wadon den bekteni
ꦄꦮꦺꦃꦫꦱꦅꦔ꧀ꦏꦁꦚꦠ
Aweh rasa ingkang nyata
꧇꧑꧔꧇
14
ꦱꦗꦠꦶꦤꦺꦫꦱꦏꦁꦩꦼꦚ꧀ꦕꦂꦏꦼꦤ꧀ꦮꦶꦗꦶ
Sajatine rasa kang mencarken wiji
ꦱꦼꦩ꧀ꦧꦁꦏꦥꦶꦁꦠꦶꦏ
Sembang kaping tiga
ꦩꦿꦶꦁꦱꦢꦸꦭꦸꦂꦠꦸꦮꦈꦒꦶ
Mring sadulur tuwa ugi
ꦩꦶꦭꦤꦺꦱꦢꦸꦭꦸꦂꦠꦸꦮ
Milane sadulur tuwa
꧇꧑꧕꧇
15
ꦥꦤ꧀ꦱꦶꦤꦼꦩ꧀ꦧꦃꦒꦼꦒꦼꦤ꧀ꦠꦶꦤꦺꦧꦥꦅꦏꦶ
Pan sinembah gegentine bapa iki
ꦥꦤ꧀ꦱꦶꦂꦤꦤꦶꦁꦧꦥ
Pan sirnaning bapa
ꦱꦢꦸꦭꦸꦂꦠꦸꦮꦒꦸꦩꦤ꧀ꦠꦶ
Sadulur tuwa gumanti
ꦅꦔ꧀ꦏꦁꦥꦤ꧀ꦠꦼꦱ꧀ꦱꦶꦫꦤꦸꦠ
Ingkang pantes sira nuta
꧇꧑꧖꧇
16
ꦅꦁꦱꦮꦫꦃꦮꦸꦫꦸꦏꦺꦅꦔ꧀ꦏꦁꦥꦿꦪꦺꦴꦒꦶ
Ing sawarah wuruke ingkang prayogi
ꦱꦼꦩ꧀ꦧꦃꦏꦁꦏꦥꦶꦁꦥꦠ꧀
Sembah kang kaping pat
ꦅꦪꦩꦫꦁꦒꦸꦫꦸꦪꦼꦏ꧀ꦠꦶ
Iya marang guru yekti
ꦩꦂꦒꦤꦺꦒꦸꦫꦸꦱꦶꦤꦼꦩ꧀ꦧꦃ
Margane guru sinembah
꧇꧑꧗꧇
17
ꦏꦁꦄꦠꦸꦢꦸꦃꦩꦫꦁꦱꦩ꧀ꦥꦸꦂꦤꦤꦶꦁꦈꦫꦶꦥ꧀
Kang atuduh marang sampurnaning urip
ꦠꦸꦩꦼꦏꦺꦁꦄꦤ꧀ꦠꦏ
Tumekeng antaka
ꦩꦝꦁꦏꦼꦤ꧀ꦥꦼꦠꦼꦔꦶꦁꦄꦠꦶ
Madhangken petenging ati
ꦄꦩ꧀ꦧꦼꦥꦼꦂꦤꦩꦂꦒꦩꦸꦭ꧀ꦪ
Ambenerna marga mulya
꧇꧑꧘꧇
18
ꦮꦺꦴꦁꦢꦸꦫꦏꦅꦁꦒꦸꦫꦸꦄꦧꦺꦴꦠ꧀ꦥꦿꦶꦧꦢꦶ
Wong duraka ing guru abot pribadi
ꦥꦿꦩꦶꦭꦥꦿꦪꦺꦴꦒ
Pramila prayoga
ꦩꦶꦤ꧀ꦠꦄꦱꦶꦃꦱꦶꦪꦁꦫꦠꦿꦶ
Minta asih siyang ratri
ꦪ꧀ꦮꦔꦤ꧀ꦠꦶꦱꦸꦢꦱꦶꦲꦶꦫ
Ywa nganti suda sihira
꧇꧑꧙꧇
19
ꦏꦥꦶꦁꦭꦶꦩꦢꦸꦤꦸꦔꦺꦱꦼꦩ꧀ꦧꦃꦥꦸꦤꦶꦏꦶ
Kaping lima dununge sembah puniki
ꦩꦿꦶꦁꦒꦸꦱ꧀ꦠꦶꦏꦁꦩꦸꦂꦧ
Mring Gusti kang murba
ꦅꦁꦥꦠꦶꦏꦭꦮꦤꦸꦫꦶꦥ꧀
Ing pati kalawan urip
ꦩꦶꦮꦃꦱꦤ꧀ꦝꦁꦭꦮꦤ꧀ꦥꦔꦤ꧀
Miwah sandhang lawan pangan
꧇꧒꧐꧇
20
ꦮꦺꦴꦁꦤꦶꦁꦢꦺꦴꦚꦮꦗꦶꦧ꧀ꦩꦤꦸꦠꦅꦁꦒꦸꦱ꧀ꦠꦶ
Wong ning donya wajib manuta ing Gusti
ꦭꦮꦤ꧀ꦢꦶꦥꦸꦤꦮꦱ꧀
Lawan dipun awas
ꦱꦥꦿꦠꦶꦔ꧀ꦏꦲꦺꦢꦺꦤ꧀ꦏꦺꦱ꧀ꦛꦶ
Sapratingkahe den kesthi
ꦄꦗꦢꦸꦥꦺꦃꦮꦸꦱꦮꦶꦫꦾ
Aja dupeh wus awirya
꧇꧒꧑꧇
21
ꦤꦺꦴꦫꦧꦺꦢꦥꦸꦠꦿꦱꦤ꧀ꦠꦤꦮꦺꦴꦁꦕꦶꦭꦶꦏ꧀
Nora beda putra santana wong cilik
ꦪꦺꦤ꧀ꦥꦝꦔꦮꦸꦭ
Yen padha ngawula
ꦥꦤ꧀ꦏꦧꦺꦃꦤꦩꦤꦶꦁꦄꦧ꧀ꦢꦶ
Pan kabeh namaning abdi
ꦪꦺꦤ꧀ꦢꦺꦴꦱꦈꦏꦸꦩꦺꦥꦝ
Yen dosa ukume padha
꧇꧒꧒꧇
22
ꦪꦺꦤ꧀ꦫꦸꦩꦱꦥꦸꦠꦿꦱꦼꦤ꧀ꦠꦤꦱꦶꦉꦏꦶ
Yen rumasa putra sentana sireki
ꦢꦢꦶꦤꦺꦠꦾꦱꦶꦫ
Dadine tyasira
ꦄꦔꦼꦤ꧀ꦢꦶꦫꦏꦼꦤ꧀ꦱꦶꦉꦏꦶ
Angendiraken sireki
ꦠꦤ꧀ꦮꦸꦫꦸꦁꦄꦤꦼꦩꦸꦥꦥ
Tan wurung anemu papa
꧇꧒꧓꧇
23
ꦔꦸꦔꦱꦏꦼꦤ꧀ꦪꦺꦤ꧀ꦥꦸꦠꦿꦱꦼꦤ꧀ꦠꦤꦺꦁꦄꦗꦶ
Ngungasaken yen putra sentaneng Aji
ꦅꦏꦸꦏꦏꦶꦄꦗ
Iku kaki aja
ꦮꦺꦴꦁꦱꦸꦮꦶꦠꦤꦺꦴꦫꦏꦺꦤꦶ
Wong suwita nora keni
ꦏꦸꦢꦸꦮꦿꦸꦪꦅꦁꦏꦂꦪꦤꦶꦫ
Kudu wruh ing karyanira
꧇꧒꧔꧇
24
ꦪꦺꦤ꧀ꦠꦶꦤꦸꦢꦸꦃꦩꦫꦁꦱꦁꦩꦲꦤꦂꦥꦠꦶ
Yen tinuduh marang Sang Maha Narpati
ꦱꦧꦫꦁꦠꦸꦢꦸꦃꦚ
Sabarang tuduhnya
ꦅꦏꦸꦌꦱ꧀ꦠꦺꦴꦏꦼꦤꦈꦒꦶ
Iku estokena ugi
ꦏꦂꦪꦤꦶꦫꦱꦸꦁꦏꦼꦩꦤ
Karya nira sungkemana
꧇꧒꧕꧇
25
ꦄꦗꦩꦼꦔꦶꦁꦅꦁꦥꦉꦤ꧀ꦠꦃꦱꦁꦱꦶꦤꦶꦮꦶ
Aja menging ing parentah Sang Siniwi
ꦢꦺꦤ꧀ꦥꦼꦛꦼꦭꦱꦺꦧ
Den pethel aseba
ꦄꦗꦩꦭꦶꦚ꧀ꦕꦸꦂꦏꦂꦢꦶ
Aja malincur ing kardi
ꦄꦗꦔꦼꦥ꧀ꦭꦸꦏꦱꦸꦔ꧀ꦏꦤꦤ꧀
Aja ngepluk asungkanan
꧇꧒꧖꧇
26
ꦭꦸꦮꦶꦃꦄꦭꦄꦭꦤꦶꦁꦗꦭ꧀ꦩꦔꦻꦴꦫꦶꦥ꧀
Luwih ala alaning jalma ngaurip
ꦮꦺꦴꦁꦔꦼꦥ꧀ꦭꦸꦏ꧀ꦱꦸꦔ꧀ꦏꦤꦤ꧀
Wong ngepluk sungkanan
ꦠꦤ꧀ꦥꦠꦸꦠ꧀ꦔꦮꦸꦊꦁꦄꦗꦶ
Tan patut ngawuleng Aji
ꦄꦔꦺꦒꦺꦫꦱꦥꦱꦥ
Angegera sapa sapa
꧇꧒꧗꧇
27
ꦄꦩꦶꦭꦸꦮꦅꦁꦧꦥꦧꦶꦪꦸꦁꦥꦿꦶꦧꦢꦶ
Amilua ing bapa biyung pribadi
ꦏꦭꦩꦸꦤ꧀ꦱꦸꦔ꧀ꦏꦤꦤ꧀
Kalamun sungkanan
ꦢꦠꦤ꧀ꦮꦸꦫꦸꦁꦢꦺꦤ꧀ꦱꦽꦒꦺꦤꦶ
Datan wurung den srengeni
ꦩꦶꦭꦮꦤꦤꦥꦶꦤꦭ
Milawanana pinala
꧇꧒꧘꧇
28
ꦩꦥꦤ꧀ꦏꦪꦩꦔ꧀ꦏꦺꦴꦤꦺꦴꦔꦮꦸꦊꦁꦒꦸꦱ꧀ꦠꦶ
Mapan kaya mangkono ngawuleng Gusti
ꦏꦭꦩꦸꦤ꧀ꦭꦺꦭꦺꦢ
Kalamun leleda
ꦠꦤ꧀ꦮꦸꦫꦸꦁꦩꦔ꧀ꦒꦶꦃꦧꦶꦭꦲꦶ
Tan wurung manggih bilahi
ꦅꦁꦮꦸꦫꦶꦄꦗꦔꦽꦱꦸꦭ
Ing wuri aja ngresula
꧇꧒꧙꧇
29
ꦥꦤ꧀ꦏꦶꦤꦂꦪꦝꦺꦮꦺꦧꦶꦭꦲꦶꦤꦶꦉꦏꦶ
Pan kinarya dhewe bilahi nireki
ꦭꦩꦸꦤ꧀ꦠꦶꦤꦼꦩꦼꦤꦤ꧀
Lamun tinemenan
ꦱꦧꦫꦁꦏꦂꦱꦤꦶꦁꦒꦸꦱ꧀ꦠꦶ
Sabarang karsaning Gusti
ꦭꦲꦶꦂꦧꦠꦶꦤ꧀ꦱꦸꦩꦶꦔ꧀ꦒꦃ
Lahir batin tan suminggah
꧇꧓꧐꧇
30
ꦩꦥꦤ꧀ꦫꦠꦸꦠꦤ꧀ꦢꦸꦮꦺꦏꦢꦁꦩꦾꦁꦱꦶꦮꦶ
Mapan ratu tan duwe kadang myang siwi
ꦱꦤꦏ꧀ꦥꦿꦱꦤꦏꦤ꧀
Sanak prasanakan
ꦠꦤꦥꦶꦒꦂꦮꦏꦏꦱꦶꦃ
Tanapi garwa kakasih
ꦄꦩꦸꦁꦧꦼꦤꦼꦂꦄꦒꦼꦩꦶꦫ
Amung bener agemira
꧇꧓꧑꧇
31
ꦏꦸꦏꦸꦩꦢꦶꦭꦢꦠ꧀ꦮꦠꦺꦴꦤ꧀ꦏꦁꦢꦺꦤꦺꦱ꧀ꦛꦶ
Kukum adil adat waton kang den esthi
ꦩꦸꦭꦤꦺꦠꦤ꧀ꦥꦝ
Mulane tan padha
ꦢꦺꦤ꧀ꦫꦸꦩꦼꦏ꧀ꦱꦩꦫꦁꦒꦸꦱ꧀ꦠꦶ
Den rumeksa marang Gusti
ꦌꦤ꧀ꦢꦶꦭꦸꦫꦺꦮꦺꦴꦁꦫꦸꦩꦺꦏ꧀ꦱ
Endi lire wong rumeksa
꧇꧓꧒꧇
32
ꦢꦶꦥꦸꦤ꧀ꦒꦼꦩꦶꦤꦱ꧀ꦠꦶꦠꦶꦄꦔꦠꦶꦄꦠꦶ
Dipun gemi nastiti angati ati
ꦒꦼꦩꦶꦩꦿꦶꦁꦏꦒꦸꦔꦤ꧀
Gemi mring kagungan
ꦅꦁꦒꦸꦱ꧀ꦠꦶꦪ꧀ꦮꦱꦶꦫꦮꦤꦶ
Ing Gusti ywa sira wani
ꦄꦔ꧀ꦒꦒꦩ꧀ꦥꦁꦭꦮꦤꦗ
Anggagampang lawan aja
꧇꧓꧓꧇
33
ꦮꦤꦶꦮꦤꦶꦤꦸꦠꦸꦂꦏꦺꦤ꧀ꦮꦢꦶꦤꦶꦁꦒꦸꦱ꧀ꦠꦶ
Wani wani nuturken wadining Gusti
ꦪꦺꦤ꧀ꦧꦶꦱꦄꦫꦮꦠ꧀
Yen bisa arawat
ꦅꦁꦮꦮꦢꦶꦱꦁꦱꦶꦤꦶꦮꦶ
Ing wawadi Sang Siniwi
ꦤꦱ꧀ꦠꦶꦠꦶꦩꦫꦁꦥꦉꦤ꧀ꦠꦃ
Nastiti marang parentah
